Хөшигийн хөндийн бүтээн байгуулалт, шинэ суурьшлын бүсийн хот төлөвлөлтийн асуудлаар БНСУ-ын Инчон хотын хөгжлийн корпорацийн гүйцэтгэх захирал Ли Санву тэргүүтэй төлөөлөгчидтэй уулзаж, санал солилцлоо. 

​Хоёр улс олон салбарт хамтран ажиллаж ирсний нэг нь барилга, хот байгуулалтын салбар бөгөөд энэ хүрээнд ухаалаг, ногоон хотуудыг байгуулах чиглэлээр хамтын ажиллагаа өргөжин тэлж буйд баяртай байгаагаа Шадар сайд уулзалтын эхэнд онцлоод, Улаанбаатар хотын төвлөрлийг сааруулахын тулд Монгол Улсын Засгийн газар шинэ Дагуул хотуудыг барьж байгуулах асуудлыг тэргүүлэх зорилт болгон ажиллаж байгааг хэлсэн юм. 

Монгол Улсын Засгийн газрын 2021 оны 06 дугаар сарын 30-ны өдрийн шийдвэрээр Төв аймгийн нутаг дэвсгэрт Улаанбаатар хотын шинэ нисэх буудлыг түшиглэн дагуул хаяа хотууд барьж байгуулах Хөшигийн хөндийн бүтээн байгуулалтыг эрчимжүүлэх, шинэ суурьшлын бүсийг түшиглэсэн эдийн засгийн чөлөөт бүс болгон хөгжүүлэхээр болсон. 

Шинээр хот байгуулах ажлын цар хүрээ өргөн учраас эхний ээлжинд хөрөнгө оруулагч талууд, олон улсын донор байгууллагуудтай санал солилцож, хамтын ажиллагааны хэлбэрүүдийг тодорхой болгох нь чухал. Иймд олон улсад орчин үеийн ухаалаг, ногоон шинэ хотуудыг амжилттай барьж байгуулсан туршлагатай улс орнуудтай хамтран шинээр байгуулах дагуул хотуудын анхан шатны төлөвлөлт, түүний эдийн засгийн механизмыг тодорхойлох, газар доорх инженерийн дэд бүтцийн төлөвлөлтийн чиглэлүүдээр хамтран ажиллах нь зүйтэй гэдэгт талууд санал нэгдэв.

Хөшигийн хөндийн бүтээн байгуулалтыг амжилттай хэрэгжүүлэхийн тулд БНСУ-ын Инчон хотын эдийн засгийн чөлөөт бүсийг хөгжүүлсэн туршлагаас суралцаж, энэ салбарт арвин туршлагатай олон улсын байгууллагуудаас зөвлөх үйлчилгээ авч хамтрах нь чухал байгааг БХБ-ын сайд Б.Мөнхбаатар мөн энэ үеэр илэрхийллээ.  

БНСУ-ын хувьд Сэжун хотыг орчин үеийн ухаалаг, ногоон хот болгож хөгжүүлэхийн зэрэгцээ БНСУ-ын Засгийн газар, холбогдох яам болон төрийн байгууллагуудыг Сэжун хот руу нүүлгэн шилжүүлсэн туршлагатай юм.