Хөдөлмөр, нийгмийн хамгааллын яам, Хөдөлмөрийн аюулгүй байдал, эрүүл ахуйн үндэсний хороо, Монголын ажил олгогч эздийн нэгдсэн холбоо, Монголын үйлдвэрчний эвлэлийн холбоо, Хөдөлмөрийн аюулгүй байдал, эрүүл мэндийн төв, Мэргэжлийн хяналтын ерөнхий газар, Нийгмийн даатгалын ерөнхий газраас жил бүрийн 04 дүгээр сард зохион байгуулдаг “ХӨДӨЛМӨРИЙН АЮУЛГҮЙ БАЙДАЛ, ЭРҮҮЛ АХУЙН САРЫН АЯН” 11 дэхь жилдээ зохион байгуулагдаж байна. 

Энэ жил улс орон даяар үйлдвэрлэлийн осол, мэргэжлээс шалтгаалсан өвчнөөс урьдчилан сэргийлэх, ХАБЭА-н мэдлэг, мэдээллийг иргэд, олон нийтэд сурталчлан таниулах ажлыг “ХӨДӨЛМӨРИЙН АЮУЛГҮЙ БАЙДАЛ, ЭРҮҮЛ МЭНДИЙН ЭЕРЭГ СОЁЛЫГ ХАМТДАА ТӨЛӨВШҮҮЛЬЕ” уриан дор тэмдэглэх юм.

Сарын аяны хүрээнд:

• “Эрүүл аюулгүй ажлын байрыг эрхэмлэгч байгууллага-2021” болзолт уралдааны шилдэг аж ахуйн нэгж байгууллагуудад шагнал гардуулах ёслолын ажиллагаа
• Хөдөлмөрийн аюулгүй байдал, эрүүл ахуйн шилдэг зөвлөлийг шалгаруулах
• ХАБЭА-н өнөөгийн байдал цаашид авах арга хэмжээ” хэлэлцүүлэг
• ЕБС-ийн сурагчдын дунд “Миний гэр бүл аюулгүй ажилладаг” сэдэвт гар зургийн уралдаан
• Аж ахуйн нэгж байгууллагын ажил олгогч нарт зориулсан ХАБЭА-н мэдлэг дээшлүүлэх цахим сургалт
• Хөдөлмөрийн аюулгүй байдал, эрүүл ахуйн үндэсний хороо, салбар хороо, зөвлөлийн гишүүдийг чадавхжуулах сургалт зэрэг өргөн хүрээг хамруулахаар төлөвлөөд байна.

Монгол улсын хэмжээнд уул уурхай, барилга, зам тээвэр, хүнд үйлдвэрлэлийн салбарын эрчимтэй хөгжилтэй зэрэгцэн ажлын байрны сөрөг хүчин зүйлүүд нэмэгдэж, хөдөлмөрийн сөрөг хүчин зүйлийг үнэлэх бууруулах, хяналтыг сайжруулахад хууль эрхзүйн бодлого зохицуулалт, дүрэм журам, стандартуудыг аж ахуйн нэгж байгууллагууд мөрдөн хэрэгжүүлж байгаа ч үйлдвэрлэлийн осол, мэргэжлээс шалтгаалсан өвчний тоо тогтвортой буурахгүй байна.

2021 оны байдлаар Мэргэжлийн өвчин судлалын эмнэлгийн хяналтад 2810 иргэн хөдөлмөрийн чадвар алдалттай идэвхтэй хяналтад байгаагаас 1477 буюу 52.6 хувь нь тоосны шалтгаант амьсгалын эрхтэн тогтолцооны эмгэг эзэлж байна. Мөн 23.4 хувь нь мэдрэлийн өвчин 9.8 хувь нь хордлогын өвчин тус тус эзэлж байгаа юм. Түүнчлэн салбараар нь авч үзвэл 72.4 хувь нь уул уурхай, 12.5 хувь нь барилга, 7 хувь нь цахилгаан, хий уур агааржуулалтын салбарт тоосжилтын шалтгаант мэргэжлийн өвчнүүд тохиолдож байна.  Харин энэ онд шинээр 50 хүн МШӨ тогтоолгосон. 

Тиймээс үйлдвэрлэлийн орчин нөхцөлийг сайжруулах, ажилтныг ажлын байран дахь осол, мэргэжлээс шалтгаалсан өвчлөл болон бусад эрсдэлт хүчин зүйлийн нөлөөллөөс хамгаалах, урьдчилан сэргийлэх,  ХАБЭА-н үйл ажиллагааг хэрэгжүүлэхэд шаардлагатай дэвшилтэд технологийг нийтийн хүртээл болгох, хөдөлмөрийн аюулгүй байдал, эрүүл мэндийн эерэг соёлыг түгээх нь сарын аяны зорилго юм.

Олон улсын хөдөлмөрийн байгууллагаас жил бүрийн 04 дүгээр сарын 28-ны өдрийг “Ажлын байран дахь хөдөлмөрийн аюулгүй байдал, эрүүл ахуйн дэлхийн өдөр” болгон тэмдэглэж байхаар 2003 онд шийдвэрлэсэн байдаг.