1931 онд Ардын хувьсгалын арван жилийн ойгоор Зөвлөлт Социалист Бүгд Найрамдах Холбоот Орос Улсаас иж бүрэн тоноглосон "Тарваган тахал өвчнийг эсэргүүцэх лаборатор"-ийг Монголын ард түмэнд бэлэглэжээ. Үүгээр энэ байгууллагын суурь тавигдсан түүхтэй. Энэхүү салбарын түүхийг бүтээлцсэн үе, үеийн ахмад эмч, биологич, эрдэмтэн судлаачид, эрүүл мэндийн ажилтан тэдний бүтээлч санаачилга, нөр их хөдөлмөрийн үр дүнд Зоонозын өвчинтэй тэмцэх, сэргийлэх байгууллага эдүгээ олон улсын түвшинд хүрсэн "Үндэсний лавлагаа төв" 15 аймаг, 1 дүүрэгт "салбар нэгж"-тэйгээр үйл ажиллагаа явуулж байна.

Байгуулагдсан цагаасаа тус байгууллага дан ганц тарваган тахал өвчин төдийгүй хачиг, шумуулаар дамжих халдвар, амьтнаас хүнд дамжих боом, галзуу, бэтэг зэрэг анхаарал татсан халдварт өвчнүүдийг тандан судалдаг юм.

Тус байгууллагын түүхт 90 жилийн ойн арга хэмжээнд Эрүүл мэндийн сайд С.Энхболд, Ерөнхийлөгчийн Эрүүл мэнд, спортын зөвлөх Т.Мөнхсайхан, Зоонозын өвчин судлалын үндэсний төвийн захирал Н.Цогбадрах болон эрдэмтэн судлаачид, үе үеийн ахмад ажилчид оролцлоо. Зоонозын өвчин судлалын үндэсний төв ОХУ, БНХАУ,АНУ, Япон, Казахстан зэрэг  улсын салбар хоорондын байгууллагатай хамтран эрдэм шинжилгээ, судалгааны ажлыг өргөжүүлж, 12 эрдэмтэн, 30 гаруй магистр төрөн гарчээ.

Засгийн газраас зоонозын өвчинтэй тэмцэх сэргийлэх чадавхыг сайжруулахад анхаарч, Засгийн газрын 2020-2024 оны үйл ажиллагааны хөтөлбөрт хилийн боомтод тандалтын цэг байгуулах, зоонозын өвчин судлалын төвгүй аймгуудад төв байгуулахаар төлөвлөжээ.