Авлигатай тэмцэх газраас 2020 онд Шүүхийн ерөнхий зөвлөлд ирүүлсэн шүүгч С.Төмөрбатад холбогдох албан бичгийг үндэслэн Шүүхийн сахилгын хороо өнгөрсөн онд сахилгын хэрэг үүсгэн шалгажээ.

Тус хороо уг асуудлыг Пүрэв гарагт хэлэлцсэн байна.

Хуралдаанаар нотлох дүгнэлтийг хянан хэлэлцээд шүүхийн тухай хуулийн 112 дугаар зүйлийн 112.1.3 дахь хэсэгт заасныг үндэслэн нотлох дүгнэлтийг бүхэлд нь хүлээн авч, шүүгч С.Төмөрбатыг шүүхийн тухай хуулийн 52-р зүйлийн 52.1, мөн хуулийн 57 дугаар зүйлийн 57.1.7  дахь хэсэгт заасны дагуу огцруулах шийтгэл оногдуулжээ.

Шүүгч С.Төмөрбатыг хөрөнгө, орлогоо мэдүүлээгүй гэдгийг тухайн үед АТГ мэдээлж байсан юм.

Шүүхийн тухай хуулийн заалт:

52 дугаар зүйл.Шүүгч, түүний гэр бүлийн гишүүний хөрөнгө, орлогын мэдүүлэг

52.1.Шүүгч Авлигын эсрэг хууль болон Нийтийн албанд нийтийн болон хувийн ашиг сонирхлыг зохицуулах, ашиг сонирхлын зөрчлөөс урьдчилан сэргийлэх тухай хуульд заасан журмын дагуу хөрөнгө, орлогын мэдүүлэг, хувийн ашиг сонирхлын мэдүүлгийг үнэн зөв гаргаж өгөх үүрэгтэй.

57.1.7.энэ хуулийн 50.1.6, 50.1.10, 50.1.12, 50.1.23, 50.1.39, 52.1-д заасан зөрчилд хаалттай сануулах, эсхүл нээлттэй сануулах, эсхүл цалингийн хэмжээг зургаа хүртэл сараар 20 хүртэл хувиар бууруулах, эсхүл шүүгчийн бүрэн эрхийг гурван сар хүртэлх хугацаагаар түдгэлзүүлж, сургалтад суухыг даалгах, эсхүл огцруулах; хэмээн заажээ.

Ташрамд дурдахад, Салхитын мөнгөний ордын авлигын хэрэгт холбогдсон 17 шүүгчийн бүрэн эрхийг түдгэлзүүлэн шалгаж эхэлсэн байдаг. Тэдний нэг, АНУ-ын хил дээр их хэмжээний валют авч яваад саатуулагдсан тухай мэдээлэл гарсан нь Нийслэлийн захиргааны хэргийн анхан шатны шүүхийн шүүгч С.Төмөрбат байсан юм.