“Хүүхдийн мөнгөн хуримтлалыг Төрийн санд байршуулан хуримтлуулах, бүртгэх, олгох журам”-ыг баталж, хэрэгжилтэд нь хяналт тавьж ажиллахыг Сангийн сайд Б.Жавхлан, Хөдөлмөр, нийгмийн хамгааллын сайд А.Ариунзаяа нарт үүрэг болголоо.

Уг журмаар Монгол Улсын 0-18 хүртлэх насны иргэн бүрт хүүхдийн мөнгөн хуримтлал үүсгэх, бүртгэх, хуримтлалаас мөнгөн хэлбэрээр олгох асуудлыг зохицуулах юм.

Журам хүчин төгөлдөр хэрэгжих эхлэхээс өмнө, 2022 оны 01 дүгээр сарын 01-ний байдлаар Халамжийн нэгдсэн санд бүртгэлтэй буюу хүүхдийн мөнгөн тэтгэмж авч байсан 1,2 сая хүүхдийг хуримтлалд шууд хамруулна.   

Коронавируст халдварын цар тахлын нөлөө бүрэн арилаагүй өнөөгийн нөхцөлд бага, дунд орлоготой өрхүүд орлогын эрсдэлд орж болзошгүй тул хүүхдийн эцэг, эх, хууль ёсны асран хамгаалагч хүсэлт гаргавал хүүхдийн мөнгөн хуримтлалаас тодорхой хувийг сар бүр бэлнээр авах боломжтой. Хуримтлалаас мөнгөн хэлбэрээр авах хүсэлт гаргах явцыг иргэдэд чирэгдэл багатай зохион байгуулна. Иргэд ehalamj.mn цахим хуудас, ebarimt гар утасны аппликейшн ашиглан хүсэлтээ гаргана. Цахимаар гаргах боломжгүй бол харьяа Хөдөлмөр, халамжийн үйлчилгээний хэлтэс эсвэл хүүхдийн нэрийн данс байрших арилжааны банкны салбарт хандаж болно.

Хуримтлалаас мөнгөн хэлбэрээр авах хүсэлт гаргахдаа дараагийн саруудын хуримтлалыг мөнгөн хэлбэрээр авах сонголтоо урьдчилан гаргаж болно. Хүүхдийн мөнгөн хуримтлалын тогтолцоонд шилжиж байгаатай холбоотойгоор “Хүүхдийн мөнгөн тэтгэмж олгох журам”-ыг хүчингүй болгосон байна.

Сангийн сайд Б.Жавхлангийн зүгээс "Хүүхдийн мөнгө сар бүр олгогддог хэвээр байна. Засгийн газар энэ жилээс ирээдүй хойч үеийн хүүхдүүдэд мөнгөө хадгалах уу, эсвэл шууд зарцуулах уу гэдэг сонголт хийх боломжийг нь олгож байна. Тиймээс хүүхдийн мөнгө олгох бүрд хадгалах уу, зарцуулах уу гэж асууна гэсэн үг. Үүнийг хялбаршуулахын тулд вебсайт дээр тохиргоо хийсэн. Хэрэв сар бүр асуултад хариулах төвөгтэй байвал нэг удаад бүх сонголтоо хийх, эсвэл шаардлагагүй гэж үзвэл сар бүр сонголтоо хийгээд явах боломжтой. Халамжийн ажилтнууд хүүхэд, асран хамгаалагчидтай нь биечлэн уулзаад асуух зэрэг бүх боломжуудыг дайчилж байгаа. Одоогийн байдлаар 1.1 сая хүүхэд сонголтоо хийгээд байна.

Иргэд хүүхдийн мөнгөө төрийн санд хадгалах уу, эсвэл төрийн сангаас татаад ашиглах, эс бөгөөс арилжааны банкны хүүхдийн хадгаламжинд хадгалах эсэх нь өөрийнх нь сонголт байна. Энэ байдал 2022 оны долдугаар сарын 1-н хүртэл үргэлжилнэ" гэсэн тайлбарыг өгөөд буй.