Сонгинохайрхан дүүргийн 41-р хороо цэцэрлэгийн насны  1170 хүүхэдтэй, төрийн өмчийн хоёр, халамжийн нэг цэцэрлэгтэй аж. Эдгээр цэцэрлэгт мөн дүүргийн 24 дүгээр хорооны багачууд сурдаг, ачаалал нь их байдаг байна. 

Тэгвэл “Нямбаатар сан”-гийн санаачилгаар 41 дүгээр хороонд шинэ цэцэрлэгийн барилгын ажлыг өнөөдөр эхлүүллээ. Хорооны 158-р цэцэрлэгийн өргөтгөл хэлбэрээр барьж буй эл цэцэрлэг 75 ортой байх юм. Барилгын ажлыг “Саруул-Өглөө” ХХК гүйцэтгэх бөгөөд шаардагдах хөрөнгийг “Нямбаатар сан”, хандивлагчид бүрэн хариуцна. “Саруул-Өглөө” компанийнхан цэцэрлэгийг ирэх намар ашигладтад оруулна гэдгээ шав тавих ёслолын үеэр хэллээ.

Ташрамд, ХЗДХ-ийн сайд Х.Нямбаатар өнгөрсөн жилүүдэд “Нямбаатар сан”-гаараа дамжуулан тойрогтоо гурван цэцэрлэг барьж, ашиглалтад оруулжээ. Дээрх 158 дугаар цэцэрлэг тус сангаас барьж буй дөрөв дэх цэцэрлэг болж байгаа юм.