Засгийн газрын ээлжит хуралдаанаар боловсролын салбартай холбоотой хэд хэдэн шийдвэрийг гаргаж, сайд Л.Энх-Амгаланд хэрэгжүүлэх үүрэг өгсөн байдаг. Энэ хүрээнд Өмнөговь аймагт ШУТИС-ийн харьяа сургуулийг шинээр байгуулахаар болсон юм. Үүнтэй холбоотойгоор Боловсрол шинжлэх ухааны дэд сайд Г.Ганбаяраар ахлуулсан ажлын хэсэг аймгийн удирдлагуудтай уулзжээ. Тус аймагт их дээд сургуулийг “Сургалт-эрдэм шинжилгээ-үйлдвэрлэлийн цогцолбор” болгон орон нутагт хөгжүүлэх ажлын төлөвлөгөөг, орон нутгийн онцлог, бүсчилсэн хөгжлийн үзэл баримтлалд нийцүүлэн ШУТИС-тай хамтран боловсруулах юм.

Их сургуулийн хотхоныг Даланзадгад хотод 15 га талбайд байгуулахаар төлөвлөснийг аймгийн удирдлагууд танилцуулсан байна. Шинжлэх ухааны сургуулийг байгуулснаар геологи, уул уурхай, технологийн чиглэлийн мэргэжилтнийг бэлтгэх юм.  Ингэхдээ орон нутагт суралцах оюутнуудад зориулж сургалтын төлбөрийн хөнгөлөлт, тэтгэлэг олгох, багш, ажилтны орон нутагт тогтвор суурьшилтай ажилласны тэтгэмж олгох эрх зүйн орчныг бүрдүүлэх асуудлыг үе шаттайгаар хэрэгжүүлэхээр төлөвлөжээ. ШУТИС-ийн хувьд харьяа сургууль байгуулсан туршлагатай.