Ерөнхийлөгч У.Хүрэлсүхийг Ерөнхий сайд байх үед Засгийн газрын тогтоолоор "Богд Зонхова" цогцолбор барих ажил 5.5 тэрбумыг төсөвлөсөн байдаг. Гэвч ирэх оны төсөвт уг бүтээн байгуулалтын зардлыг 27 тэрбумаар нэмэгдүүлсэн нь олон нийтийн шүүмжлэлд өртөөд байгаа байгаа юм. Уг асуудалтай холбогдуулж, Соёлын сайд Ч.Номин тайлбар хийжээ.

Тэрбээр "Түүх, шашны соёлыг дэлгэрүүлэх "Богд Зонхова" цогцолборын төсөл намайг Соёлын сайдаар томилогдохоос өмнө эхэлсэн төсөл юм. Анх Соёлын яам энэ цогцолборыг барих, эхлүүлэх санаачилга гаргаагүй, өнгөрсөн хугацаанд энэ төсөлд нэг ч төгрөг зарцуулаагүй болно. Энэ хөрөнгө оруулалтыг цаг үеэ олоогүй гэж үзэж байгаа учраас Соёлын сайдын хувьд “Богд зонхова” цогцолборын төсөлд хөрөнгө зарцуулахгүй болохоо үүгээр мэдэгдэж байна.

Монгол Улсын хувьд түүх, соёл, шашин нь бидний оршин тогтнохтой холбоотой асуудал. Гэвч, аль ч шашинд сүсэглэх, шүтэх нь аливаа цогцолборыг барих, болихоос үл шалтгаалах дотоод итгэл үнэмшлийн асуудал тул эвийг эрхэмлэхийг Та бүхнээс хичээнгүйлэн хүсье" гэжээ.